Psa 83 | NdeIBE | STEP | Ingoma. Ihubo lika-Asafi. Hawu Nkulunkulu, ungathuli uthi nya; ungathi zwi, O Nkulunkulu, ungathi cwaka.

Psalms 83

1 Hawu Nkulunkulu, ungathuli uthi nya; ungathi zwi, O Nkulunkulu, ungathi cwaka.

2 Akubone ukuthi ziphithizela kanjani izitha zakho, ukuthi ziwaqaphisa kanganani amakhanda azo.

3 Ngobuqili zakhela abantu bakho amacebo; zisongela labo obathembileyo.

4 Bathi, “Wozani kasibabhuqe du njengesizwe, ukuze ibizo lika-Israyeli lingaphindi likhunjulwe.”

5 Nganhliziyonye bawakha amacebo ndawonye; bayahlangana beme ndawonye ukumelana lawe –

6 amathente ase-Edomi lama-Ishmayeli, awamaMowabi lawamaHagiri,

7 amaGebhali, lama-Amoni lama-Amaleki, amaFilisti labantu beThire.

8 Lama-Asiriya asebambene labo ukuqinisa izizukulwane zikaLothi.

9 Yenza kubo njengoba wenza eMidiyani, njengowakwenza kuSisera loJabhini emfuleni iKhishoni,

10 ababhubha e-Endori baba njengezibi emhlabathini.

11 Yenza izikhulu zabo zibe njengo-Orebi loZeyebi, wonke amakhosana abo abe njengoZebha loZalimuna,

12 abathi, “Kasiwathumbe amadlelo kaNkulunkulu.”

13 Benze babe njengenkunkuma, O Nkulunkulu wami, njengamakhoba ephetshulwa ngumoya.

14 Njengalokhu umlilo uhangula igusu kumbe ilangabi lilumathisa izintaba,

15 kanjalo basukele ngesivunguvungu sakho ubethuse ngesiphepho sakho.

16 Bahuqe ubuso babo ngehlazo ukuze abantu balidinge ibizo lakho, O Jehova.

17 Sengathi bangayangeka lanini badunyazwe; kungathi bangafa belehlazo.

18 Yenza bakwazi ukuthi wena, obizo lakho unguJehova – ukuthi wena wedwa ungoPhezukonke emhlabeni wonke.